Plantun de Prouvènço

Pèr coumpara dos planto d'encò nostre

Orobanche teucrii & Rosa rubiginosa

Orobanche teucrii

Orobanchaceae

Nom en français : Orobanche de la germandrée.

Descripcioun :
Aquesto erbo-de-taurèu se rescontro dins li tepiero roucaiouso e lis esboudèu cauquié pulèu en mountagno. Parasito li calamandrié, g. Teucrium, mai pas soulamen. Sèmblo proun à Orobanche caryophyllacea, pamens èi pu founso (roujo à brunello), pu pichoto e a mens de flour. Coume elo lis estamino soun estacado à la baso di petalo e à l'estigmate rouge à brun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : ges
Tipe bioulougico : Teroufite
Cicle bioulougico : Planto de l'an

Gènre : Orobanche
Famiho : Orobanchaceae

Ordre : Lamiales

Coulour de la flour : Brunello
Petalo : irreguliero
Ø (o loungour) flour : 2 à 2,8 cm
Flourido : Printèms - Estiéu

Sòu : Ca
Autour basso e auto : 200 à 1900 m
Aparado : Noun
Mai à juliet

Liò : Tepiero roucaiouso - Roucaio - Pelouso - Esboudèu
Estànci : Subremediterran à Subaupen
Couroulougi : Éuroupenco
Ref. sc. : Orobanche teucrii Holandre, 1829

Agufié(-roussas)

Rosa rubiginosa

Rosaceae

Àutri noum : Agoulencié, Agrufié, Agoulancié, Grato-quiéu, Tapo-cuou.

Nom en français : Églantier couleur de rouille.

Descripcioun :
Aquel agufié, Rosa rubiginosa, fai parti dóu group d'agoulencié qu'an de glando resinouso dessouto li fueio, ço que ié dounon aquesto coulour roussasso. Trachis dins li relarg dubert coume lis orle de bos. Se destrìo de Rosa micrantha qu'a lis estile lanu, si flour soun mai grando e peréu soun óurifice calicinau pu larg.

Usanço :
Tóuti lis agufié fan de fru (grato-cuou, agoulènço...), riche en vitamino C e anti-enflamatiéu, que soun bon à manja, majamen en counfituro.